Las valadas occitanas que s’eslarjon da la Val d’Ols al Monregalés presenton una granda varietat dins la cusina, embe plats de la montanha piemontesa e autres qu’arribon de la França. Lhi produchs emplegats son aqueli del pòst, ben apreciats vist las qualitats de l’ambient. Presentem quarque recèpta del pòst basaa sus la tradicion des trifolas:

Trifolas bolhias.

Pelar las trifolas e las talhar en toquets de la mesma dimension; butar-las dins la caisseròla e las curbir d’aiga freida. Salar, curbir a far bulhir; quora son cuechas, escolar, butar mai las trifolas dins la caisseròla sal fuèc per far cuchar l’aiga avançaa. Servir ben chaudas embe fromatge a tòc, alhòli o toma frescha.

Torta de Camoliera.

Ingredients: ½ kg de trifolas, 2 ectos de ris, 1 chaol, 2 salamins da far bulhir, 2 uòus, toma dura (da gratusar), pan gratusat, sal.

Còire dui salamins, far-lhi freidar e talhar-lhi a tòcs. Bulhir las trifolas e esbinhar-las, còire al dent lo ris en aiga salaa; bulhir mes chaol, escolar-lo e chapolar-lo. Butar dins un grilet, jontar dui uòus entiers e un veire de toma gratusaa. Mesclar tot e tirar l’emplum dins una grala da forn emburraa. Curbir embe una pessuaa de toma gratusaa e burre. Còire en forn per mes’ora e far rabinar, servir ben chaud.

Lhi sobrics.

Far bulhir sieis trifolas en aiga salaa e las pistar. Jontar un culhier o dui de farina, dui uòus entiers esbatuts e mesclar. Far fricassar a culhieraas en uèli bulhent, escolar e servir chauds.

La cogorda. Far bulhir quatre trifolas e la mesma quantitat de coça en aiga salaa. Far fricassar mesa ceba talhaa fina. Esquichar tot en purea ajontant la ceba, mes litre da lach freid e un pauc d’aiga per far una crema. Far bulhir e jontar un veire de ris; servir chaud conduchat embe burre.