|
5) LO VIÒL DE LA FE
Dislivel: m 430
Temp: oras 5
Percors: Beal — Provinciala Celas/Albarèt — passarella — Bassura (Celas) — Pasquier (Celas) —Gleisa (Celas) — Au solelh (Celas) — Chapèla de Sant Jaco (Celas) —Vileta — viòl de lai del Maira — Provinciala Celas/Albarèt — Beal.
Dificultat: E
Itinerari a circuït que traversa de ruaas de la comuna de Celas e documenta nombrosas testimonianças de la devocion popolara (pilons, chapèlas), e permet de visitar la famosa Parroquiala de Celas.
Da la plaça de la comuna de L’Arma seguir lo premier tòc de l’itinerari precedent arribant a la provinciala per Celas que chal seguir per un pichòt tòc vers mont (menc d’un km) fins a rescontrar sus la gaucha un modern pont en bòsc que permet de traversar lo Beal. Seguent las marcas jaunas di Percors Occitans se monta dins lo bòsc passant sot lo pòrtic d’un premier pilon (969m, pinturas a fresc de S. Antòni Abat del 1863). S’arriba après a un second pilon, realizat ental 1923 per aver recebut una gracia (dedins son presentas las fotografias di comittents tornats da la Premiera Guèrra Mondiala). D’aquì, anant vers Sud, s’arriba a la ruaa Bassura de Celas (1072m), embe de maisons embe la lòbia en mèlze esculturat. Se monta vers la gleisa e après se continua en plan entre las maisons, passant sobre la ruaa Mattalia (1080m). Traversaa la via asfaltaa, s’arriba a una crotz en pèira que preced un blanc pilon restaurat: dedins pinturas a fresc d’una Madòna embe lo Pichòt entre lhi sants Antòni e Mateu, embre Santa Caterina e Santa Angela. Traversaa dui bòts la via asfaltaa que monta a Gleisa, s’arriba a Pasquier (1195 m, un pilon en fons a la ruaa es decorat embe figuras naïf coma una Crocifission e una Madòna Adoloraa passaa da sabres).
Un darrier tòc de viòl pòrta a Glèisa de Celas (1270m) ente, dins la Parroquiala, es gardat un poliptic d’Hans Clemer, ver tresòr de l’art sacra. Se continua sua la via asfaltaa que drant de Gleisa vira a gaucha, montant vers Nòrd fins a Au Solelh (1277m). Se traversa la ruaa prenent un chamin que, drant en legiera montaa e après en plan, pòrta a un pilon embe pòrtic frescat embe una Madòna entre lhi Sants Antòni e Jusep. En legiera calaa s’arriba a la chapèla de Sant Jaco (1270m), embe un pòrtic que proteg la façada frescaa, e a un autre pilon (1220m) plaçat dins un tornant, decorat embe una Madòna embe lo Pichòt entre lhi Sants Manh e Maurici.
Après un second tornant comença un traverson en calaa: a 5 minutas dal darrier pilon se laissa la via esterraa per prener un viòl que cala drec a gaucha dins lhi fauls. Se cala fito fins a una esterraa que, anant vers gaucha, pòrta a ruaa la Vileta (815m). Al pòst de calar entre las maisons, se vira a gaucha sus una pista forestala que embe quarque monta-cala percor l’aigavers de drecha del Maira ponchant vers Ovest; après cala arlòng del riu. A la fin se rescontra s’la gaucha un viòl, senhalat embe de bolins de vernís blaua, que pòl èsser un pauc estremat da una vegetacion espessa. Embe quarque tornant dins lo bòsc se monta fins a un prat, d’ente se remonta un pauc vers gaucha per calar sus un viòl que chal seguir vers aval e que pòrta fins a la provinciala per Celas: se vira a drecha arribant fito a L’Arma. |
 |
