LHI VIÒLS DE LA COMUNA

La comuna de Macra es plaçaa a 875m a 17 km da Draonier; un bòt era identifiaa embe la denominacion de “Alma”, encara presenta dins la parlaa del pòst (l’Arma).

Lhi itineraris presentats s’eslarjon dins la comuna de L’Arma e en part dins aqueli d’Estròp, Celas e La Marmo, sus lhi vielhs chamins que portavon dal capluèc a las ruaas.

Lo territòri comunal permet de far de promenadas ben diferentas per per duraa, empenh, ambients traversats: de fach es possible cerner lo versant idrografic de drecha, a l’ubac e dins lhi blscs, o aquel de gaucha, a l’adrech. Lhi itineraris donon satisfaccion sie per lhi enterès liats al païsatge, mas decò per aqueli istòrics, artistics, antropològics. De fach es un territòri que buta d’acòrd natura e cultura, ente son encara nombrosas las testimonianças de la vita dins l’ambient alpin sustot dins las ruaas e las granjas.

Pròpi per donar espaci a totas las ofèrtas, lhi itineraris presentats son tematics.
Chasqu’un buta en evidença un subjèct: las flors, las bestias, l’ambient alpin, l’istòria, la fe.

Dapè a aquesti, lo territòri de L’Arma es traversat da autres viòls: lhi Percors Occitans (P.O.) e la Granda Traversaa des Alps G.T.A. Lhi premiers seguon l’as de la Val Maira sus tuchi dui lhi aigavers, la seconda traversa la valada sus un percors qu’embraça totas las Alps. Per nombrós sècles aquesti son estats lhi chamins de viatjaires, merchants, pelerins vers la plana de Coni e la França e encara encuei es possible retrobar las peaas e las restas de la presença de l’òme. Restas importantas son lhi molins dapè lhi rius, las terrassas des vinhas, lhi sechaors per las granalhas, lhi pilons votius, las maisons di boscatiers e las granjas di marguiers encuei en granda part abandonats.